Urðarkirkja er í Dalvíkurprestakalli í Eyjafjarðarprófastsdæmi. Urðir eru bær og kirkjustaðru í innanverðum Svarfaðardal. Kirkjan að Urðum fauk í miklu ofviðri 20. september árið 1900 og brotnaði í spón. Þetta veður er almennt kallað „kirkjuveðrið", því að allar fjórar kirkjurnar í dalnum fuku, ýmist á grunni eða alveg. Strax var hafizt handa við byggingu nýrrar timburkirkju, turnlausa, með lítilli forkirkju á hlöðnum grunni.

Söngloft er í henni og hún tekur 40-50 manns í sæti. Hún stendur í allstórum garði á fornu kirkjustæði. Nýr grafreitur var tekinn upp 1944 á dálitlum hjalla ofan við staðinn.

Munirnir, sem björguðust úr braki gömlu kirkjunnar prýða þessa kirkju. Altaristaflan eftur Arngrím Gíslason, málara, skemmdist talsvert en gert var við hana.

Prédikunarstóllinn er frá 1766 og er allsérkennilegur. Jón Bergsson frá Hæringsstöðum skar haglega út númeratöfluna. Önnur tveggja klukkna er talin vera frá 1534.

Katólskar kirkjur á staðnum voru helgaðar Maríu guðsmóður og Andrési postula. Þar var útkirkja frá Tjörn þar til prestakallið var lagt niður 1917 og sóknirnar lagðar til Vallaprestakalls og síðan til Dalvíkur.