|
 Eyrarbakkakirkja
er í Eyrarbakkapresta-kalli í Árnesprófastsdæmi. Hún var
vígð árið 1890, en
fram að því áttu Eyrbekkingar kirkjusókn á Stokkseyri.
Árið 1890 var íbúafjöldi Eyrarbakka 702, sem var ástæða
skiptingar sóknarinnar. Séra Jón Björnsson var
aðalhvatamaður byggingar kirkjunnar. Hún varð ekki
sóknar- og graftarkirkja fyrr en 1894. Jóhann Fr.
Jónsson teiknaði kirkjuna. Hann var helzti smiður
Eyrarbakka á árunum 1880-90. Útlendingakirkja mun hafa
verið á Eyrarbakka í katólskum sið.
Kirkjan tekur 230-40 manns í sæti.
Upprunalega var há járnstöng með veðurvita á turni
kirkjunnar, en nú er þar ljóskross. Guðmundur
Daníelsson, rithöfundur, kallaði vindhanann „Járnblómið”.
Einar Herjólfsson, sem kom
með svartadauða í Hvalfjörð 1402, var veginn í gamla
kirkjugarðinum árið 1412. Útkirkjur eru á Stokkseyri og í
Gaulverjabæ.
Friðuð 1. janúar
1990.
Sögufrægasti gripur
kirkjunnar er altaristaflan, mynd af
Jesú á tali við samversku konuna við Jakobsbrunninn (Jóh. 4,
13-14). Undir
henni stendur: „Hver sem drekkur af því vatni, sem ég
mun gefa honum, hann mun aldrei að eilífu þyrsta."
Séra Jón Björnsson sigldi m.a. í erindum
kirkjubyggingarinnar til Kaupmannahafnar til þess að útvega
kirkjuviðinn. Hann gekk á fund
konungs og drottningar og fékk svo
góðar viðtökur, að Louise, drottning Kristjáns konungs IX.,
gaf kirkjunni altaristöflu, sem hún hafði sjálf málað.
Nafn drottningar er á töflunni
og ártalið 1891. Drottning var listfeng og er kunnugt um
altaristöflur eftir hana í þremur kirkjum í Danmörku
(Gentofte, Klitmøller og Lundø).
Kirkjan á kertastjaka úr Kaldaðarneskirkju,
sem var lögð niður 1902. Þeir bera ártalið 1780 og
stafina E.S.S. og eru greinilega íslenzk smíð og handunnir.
Ljósakrónan í kór kirkjunnar er einnig úr Kaldaðarneskirkju.
Stundaklukka var sett upp í turni kirkjunnar árið 1918 (slær
á heilum og hálfum tíma). Jakob A. Lefolii, kaupmaður
gaf hana.
Árið 1977 var hafizt handa við miklar endurbætur á kirkjunni
og þeim lauk tveimur árum síðar. Árið 1995 var nýtt,
íslenzkt, tveggja radda pípuorgel tekið í notkun. |
