Hagakirkja er í Tálknafjarðarprestakalli í Barðastrandarprófastsdæmi.  Í Haga á Barðaströnd var kirkja helguð heilögum Nikulási í katólskum sið.  Þarna var útkirkja frá Brjánslæk á meðan þar var prestakall, en síðan var sóknin lögð til Sauðlauksdals.  Núverandi kirkja var byggð 1897-1899 og vígð 12. nóvember 1899.  Yfirsmiður var Magnús Magnússon frá Flatey.

Eigendur kirkjunnar voru Björn Sigurðsson, kaupmaður í Flatey, og fleiri.  Þeir höfðu látið smíða kirkju í Haga 1892 en hún fauk snemma vetrar 1897 og önnur var reist strax í staðinn.  Hagakirkja var bændakirkja til 1952, þegar söfnuðurinn tók við henni af eigendunum, Hákoni J. Kristóferssyni og Nielsi P. Sigurðssyni í Reykjavík.

Kirkjan er byggð úr timbri og allvel búin gripum, m.a. kaleik úr gulli og silfri, gömlu skírnarfati úr eiri með upphleyptum myndum, fjórum altarisstjökum úr kopar, róðukrossi á altari og altarisklæðum með ártalinu 1649.  Predikunarstóllinn með myndum af guðspjallamönnunum er frá 1745.  Anker Lund málaði myndina af kvöldmáltíðinni í Emmaus á altaristöflunni árið 1900.