Kollafjarðarneskirkja er í Hólmavíkurprestakalli í Húnavatnaprófastsdæmi.  Kollafjarðarnes er kirkjustaður og bær við norðanverðan Kollafjörð.

Árið 1907 voru Fells- og Tröllatungusóknir sameinaðar Kollafjarðarnesi, þar sem prestar sátu um árabil.  Árið 1950 var þessi sókn lögð til Staðar í Steingrímsfirði og hefur verið þjónað frá Hólmavík síðan.

Núverandi kirkja í Kollafjarðarnesi var byggð úr steinsteypu og vígð 5. september 1909.  Kaleikur og patina kirkjunnar eru frá 1711.  Hún hefur ljóskross á stöpli og á allstóra altaristöflu (Kristur í grasagarðinum) eftir A. Dorph.  Á austurvegg er tafla með kvöldmáltíðinni, máluð á tré og komin úr Fellskirkju.  Á vængjum hennar eru áletranirnar H.Í.S. (Halldór Bjarnason, sýslumaður) og A.B.D. (Ástríður Bjarnadóttir).  Hjónin gáfu Fellskirkju töfluna árið 1758.