Staðarkirkja er í Bolungarvíkurprestakalli í Ísafjarðarprófastsdæmi. Staður er eyðibýli, fyrrum prestssetur og kirkjustaður í Aðalvík við Staðarvatn. Meðal presta þar í 16 ár var séra Snorri Björnsson (1710-1803), síðar á Húsafelli í Borgarfirði. Hornstrendingar vildu glettast við prest og kanna galdrakunnáttu hans. Þeir fóru með löngu í líkkistu til kirkju og báðu Snorra að jarða þennan niðursetning að norðan, sem hefði sálast og þyrfti leg í kirkjugarði. Snorri gekk þögull og þungbúinn kringum kistuna og kvað:

Hér er komið kistuhró,
  klambrað saman af ergi,
    líkaminn er úr söltum sjó,
  en sálina finn ég hvergi.

Hann bað komumenn að hverfa sem skjótast á brott og reyna ekki að glettast við sig framar, sem þeir gerðu ekki.