Listasafnið á Akureyri er yngsta listasafnið á landinu og jafnframt það eina sinnar tegundar utan höfuðborgarsvæðisins. Safnið er til húsa við Kaupvangsstræti 12 í Listagilinu svokallaða, hjarta bæjarins, sem einnig gengur undir heitinu Grófargil. Hugmyndin að stofnun listasafns á Akureyri kom upphaflega frá Jónasi Jónssyni frá Hriflu í blaðagrein sem hann skrifaði árið 1960. Þrír áratugir liðu uns hugmyndin um Listasafnið á Akureyri komst aftur í umræðuna og varð hún loksins að veruleika á afmælisdegi bæjarins þann 29. ágúst 1993.
Listasafnið á Akureyri er til húsa þar sem áður var Mjólkursamlag KEA, en byggingin er undir sterkum áhrifum frá Bauhaus-skólanum og hinni alþjóðlegu funkis-hreyfingu. Listasafnið á Akureyri er miðpunktur og sameiningartákn þessarar Listamiðstöðvar í Grófargili.

Markmið Listasafnsins á Akureyri er að efla myndlistarlíf á Akureyri, auka þekkingu og áhuga bæjarbúa á myndlist og stuðla að framgangi sjónlista og listmenntunar. Listasafnið á Akureyri leggur áherslu á fjölbreytt sýningarhald og leitast við að kynna það framsæknasta á innlendum jafnt sem erlendum sýningarvettvangi.

Listasafnið á Akureyri er opið alla daga nema mánudaga frá kl. 12-17. Aðgangseyrir kr. 400, frítt á fimmtudögum.

Sími 461 2610 - Fax 461 2969