Ferðaþjónustan í Úthlíð hefur rekið golfvöll síðan 1992 og golfklúbbur er starfandi í tenglsum við hann. Völlurinn er ríflega 2500 m á gulum teigum og um 2200 m á rauðum.

Uppbygging hans hefur staðið yfir jafnt og þétt yfir frá því árið 1992. Búið er að setja niður nokkrar sandgryfjur og byggja upp teiga á brautum. Trjám er plantað á hverju sumri, svo ásýnd vallarins mun breytast í framtíðinni.

Völlurinn er opnaður í lok maí og verður opinn fram á haust eins lengi og veður leyfir. Vallargjöld eru greidd í Hlíðalaug og þar er einnig hægt að kaupa einföldustu golfvörur og leigja golfsett.

Klúbburinn notar veitingastaðinn Réttina sem klúbbhús, þar er hægt að kaupa mat og aðrar veitingar.