Baugsstaðaá rennur niður Flóann í Árnessýslu og skiptir hreppum. Vestan hennar er Hraungerðis- og Stokkseyrarhreppur, en austan Villingaholts-og Gaulverjarbæjarhreppur.  Áin á upptök norðan Kampholts, og heitir þá Bitrulækur. Neðar fær hún nafnið Hróarsholtslækur og neðst Baugsstaðaá og fellur til sjávar (Baugstaðarós) austan við Stokkseyri. Bleikja, sjóbirtingur og lítið eitt af laxi er í læknum, sem rennur um sléttlendi og er lengst af þröngur graflækur, með djúpum hyljum og var notaður sem aðalskurður Flóaveitunnar.

Vegalengdin frá Reykjavík er u.þ.b. 75 km.