Ekið um Hellisheiði og Suðurlandsundirlendið, sem er stærsta landbúnaðarsvæði landsins, og síðan með suðurströndinni.  Margir halda, að Suðurlandsundirlendið sé sviplaust, en skipta um skoðun, þegar fagur fjallahringurinn er skoðaður nánar.  Enginn kemst hjá því að sjá Heklu, Eyjafjallajökul, Tindfjöll, Vestmannaeyjar, Búrfell og Vörðufell í góðu veðri svo eitthvað sé nefnt. Svo má ekki gleyma aðalsögusviði Njálu á leiðinni.

Þegar Eyjafjöllum sleppir, kemur Mýrdalurinn og syðsta þorp landsins, Vík.  Jöklarnir blasa við á góðum degi og margt að sjá á leiðinni, s.s. Hjörleifshöfði, Eldhraunið, Klaustur, Dverghamrar, Núpsstaður, Skaftafell og Jökulsárlón áður en komið er til Hafnar í Hornafirði.

Dagur 1: Reykjavík - Kirkjubæjarklaustur
Ekið yfir Hellisheiði eða Þrengslin í Hveragerði og áfram til Selfoss, Hellu, Hvolsvallar þar til fyrsti næturstaður, Kirkjubæjarklaustur, blasir við.

Dagur 2: Kirkjubæjarklaustur - Höfn
Ekið í þjóðgarðinn í Skaftafelli við rætur Öræfajökuls, þar sem hæsti tindur landsins, Hvannadalshnúkur heilsar gestum á góðum degi. Síðan er haldið áfram að Jökulsárlóni áður en næsti næturstaður, Höfn, kemur í ljós.

Dagur 3: Höfn - Vík
Sama leiðin er ekin til baka og upplagt að líta á staði, sem hafa orðið útundan á austurleiðinni áður en náttstaður er fundinn í Vík eða nágrenni.

Dagur 4: Vík - Reykjavík
Nú verður ekki komizt hjá að skoða Skógafoss og hið ómetanlega Skógasafn.  Seljavallalaug er freistandi á leiðinni að Seljalandsfossi.  Síðan má halda áfram alla leið til Selfoss og líta við á Eyrarbakka og Stokkseyri, þar sem má skoða Húsið og fjöruna áður en snúið til Reykjavikur.

Söguferð um Suðurland
 

Gististaðir á leiðinni

SUÐURLAND
Á EIGIN VEGUM