SÖGUFERÐ UM VESTURLAND Á EIGIN VEGUM
Tillaga að 3 daga söguferðferð um Vesturland

Þessi ferð byrjar frá Reykjavík um Leirár og Leirársveit.  Borgarfjörðurinn og Mýrarnar eru þrungnar af sögu og fögrum stöðum, sem vert er að huga að áður en haldið er út á Snæfellsnes.

Þar er ekki síður um auðugan garð að gresja að þessu leyti og bezt er að láta ekkert fram hjá sér fara.  Ferð umhverfis Snæfellsnes er ógleymanleg og ekki má gleyma að komast í návígi við nokkrar eyjanna í Breiðafirði í leiðinni.  Þá er Skógarströndin ekin til Búðardals og ekki má gleyma að koma við að Eiríksstöðum í Haukadal og minnast landafundanna áður en haldið er um Bröttubrekku til baka.

Dagur 1:  Reykjavík-Leirársveit-Borgarnes-Snæfellsnes-Ólafsvík
Það er hægðarleikur að nota heilan dag á leiðinni um Mýrar fyrir Snæfellsjökul til Ólafsvíkur með viðkomu í Eldborg, Gerðubergi, að Ölkeldu, Búðum, Arnarstapa, Hellnum og Hólahólum svo eitthvað sé nefnt.  Þá taka við Gufuskálar, Hellissandur og Rif áður en náttstað er náð í Ólafsvík.  Á Arnarstapa bjóðast ferðir upp á Snæfellsjökul og bátsferð meðfram lágum fuglabjörgum, hvort tveggja ógleymanlegt.

Dagur 2: Ólafsvík-Grundarfjörður-Stykkishólmur
Dagurinn nýtist vel til skoðunar frá Ólafsvík og nánari skoðunar á stöðum á stuttri leið um Grundarfjörð til Stykkishólms.  Það er upplagt að leggja smálykkju á leið sína um gamla veginn fyrir Hraunsfjörð og aka um hluta Berserkjahrauns og síðan niður að Bjarnarhöfn til að smakka á hákarlinum hjá Hildibrandi og skoða kirkjuna hans og annað smálegt, sem hann hefur safnað.  Hólmarar hafa eignast heilsulind, nýja sundlaug með mjög heilnæmu vatni úr borholu í grennd.

Dagur 3:  Stykkishólmur – Búðardalur – Reykjavík.
Ekið er hjá litríku Drápuhlíðarfjallinu, fyrir Álftafjörð og um Skógarströnd til Búðardals.  Örnefni á leiðinni minna á söguna, m.a. landafundina og Eirík rauða.  Því er ekki úr vegi að heimsækja nýbyggða endurgerð af bæ Eiríks að Eiríksstöðum í Haukadal áður en haldið er yfir Bröttubrekku í Bifröst í Borgarfirði og síðan til Reykhots og Húsafell og þaðan heimleiðis um Skorradal til Reykjavikur.
 

Vesturland Söguslóðir

Kort
Barðaströnd
Borgarfjörður <> Snæfellsnes  <> Búðardalur <> Kaldidalur
 Arnarvatsheiði & Tvidægra