Goðaland er sunnan Krossár, milli Hrunár og Hvannárgils.  Þar er land hálent og giljótt.  Vestasti hluti Réttarfells (503m), Álfakirkja, er andspænis Langadal.  Hattur í Réttarfelli austanverðu, Útigönguhöfði (805m) og Heiðarhorn gnæfa yfir algrónu dalverpinu Básum, sem umlykur klettahæðina Bólhaus eða Bólfell.  Ferðafélagið Útivist fékk leyfi Skógræktarinnar (Sigurðar Blöndal) og síðan staðfestingu landbúnaðarráðherra (Pálma Jónssonar) fyrir byggingu skála í Básum, sem var fullbúinn að utan í október 1980.  Óhætt er að fullyrða, að Básar séu einhver fegursti og skjólsælasti reiturinn á Þórsmerkursvæðinu.  Þaðan liggja gönguleiðir í allar áttir, m.a. yfir Fimmvörðuháls.