Einarslón er eyðibýli vestan Malarrifs, innan þjóðgarðs í Breiðuvíkurhreppi, fyrrum kirkjustaður og verstöð, þrátt fyrir slæma lendingu.  Samkvæmt manntali 1703 bjuggu þar 62 manns og 35 manns öld síðar.  Bærinn fór í eyði um miðja 20. öldina.  Kirkja var fyrst byggð þar 1563 og lögð niður 1880.  Um tíma átti Jóhannes Sveinsson Kjarval helming jarðarinnar og fékk þar talsverðan efnivið í listaverk sín.  Þrælavík er milli Einarslóns og Malarrifs.  Þar fórst póstskipið Søløven 1857.  Það var síðasta seglskipið, sem annaðist póstflutningar til landsins og gufuskip tóku við.