Geldingaholt er bær og fyrrum kirkjustaður í Seyluhreppi í Skagafirði.  Bærinn stendur á hæð austan í Langholti.  Sóknin var aflögð 1768 og sameinuð Glaumbæjarsókn.  Sturlunga segir frá bardaga í Geldingaholti árið 1255, þar sem Hrafn Oddsson og Eyjólfur Þorsteinsson gerðu aðför að Oddi Þórarinssyni, sem fór með völd í Skagafirði fyrir hönd Þórðar Sighvatssonar kakala.  Oddur varðist vel, en lét þó líf sitt þar.

Séra Gunnlaugur Oddsson (1765-1835), dómkirkjuprestur, fæddist þar.  Hann gaf út fjölda bóka til alþýðufræðslu.  Brynleifur Tóbíasson (1890-1958), bindindisfrömuður og kennari fæddist þar líka og ólst upp.  Hann var einnig mjög ritfær og gaf út fjölda rita.