Glerhallavík er undir hömrum Tindastóls á Reykjaströnd, norðan Reykja.  Hún er fornkunn vegna glerhallanna, sem eru holufyllingar úr kvartsi í ævagömlum jarðhitarásum, sem finnast víða um land.  Brimið og önnur veðrun losa þessa kristalla úr berginu og síðan slípast þeir í brimrótinu.  Steinataka í víkinni er bönnuð, nema leyfi hafi fengizt.  Þjóðsögurnar segja, að þarna búi álfaprinsessa.