Glettingsnes er láglendur smátangi milli Kjólsvíkur og Hvalvíkur norðan hins snarbratta fjalls Glettings.  Þarna var afskekktasti bærinn í Borgarfjarðarhreppi og gönguleiðin þangað varasöm á veturna.  Á fyrri hluta 20. aldar var komið fyrir vaði til stuðnings í brekkunni niður á nesið og enn þá sjást merki um hann.  Útræði var mikið frá nesinu fyrrum, því skammt er þaðan til gjöfulla fiskimiða.  Norðan til á nesinu er nokkuð góð lending, þótt brimasamt sé.  Vitinn á nesinu var byggður 1931.  Steinhúsið ofarlega á nesinu var byggt 1933 fyrir vitavörð.  Það hefur staðið mannlaust síðan 1952.