Við Hafnarhólma er nú smábátahöfn Borgfirðinga eystri. Þar er mjög fjölbreytt fuglalíf og meðal tegunda má nefna fýl, ritu, æðarfugl og lunda. Árið 1997 var tekinn í notkun nýr og glæsilegur útsýnispallur í hólmanum. Af tillitssemi við fuglalífið er aðgengi að honum takmarkað meðan fuglinn er að setjast upp á vorin.  Í ágúst er ótakmarkað aðgengi.

Enginn verður svikinn af því að heimsækja Hafnarhólmann, nálægðin við lundann er einstök og þaðan er útsýni gott.

Smábátahöfnin við Hafnarhólma fékk árið 2003 „Bláfánann“, viðurkenningu fyrir gott aðgengi og vandaðan frágang á svæðinu.