Hlöðufell (1188m) er formfagur móbergsstapi með jökulsorfnum grágrýtiskolli og sísnævi norðan Laugardals og sunnan Langjökuls.  Það er hömrum girt en þó ekki illkleift og útsýnið af toppnum er frábært á góðum degi.  Á Hlöðuvöllum, suðvestan Hlöðufells, er sæluhús FÍ frá 1971, sem rúmar 15 manns.  Uppgangan á fjallið er greiðust meðfram vestanverðu hamragilinu ofan við sæluhúsið.

Brúará á upptök sín á Rótasandi sunnan Hlöðufells.  Þrjár akleiðir liggja að Hlöðufelli, ein frá sæluhúsinu við Brunna á Kaldadalsleið, önnur skammt ofan Gullfoss á Kjalvegi og hin þriðja frá Laugardal, norðan Laugarvatns.