Núpur við norðanverðan Dýrafjörð er fornt höfðingjasetur um aldir og skólasetur í áratugi.  Þar sat m.a. Eggert Hannesson (1550-1583), hirðstjóri og lögmaður.  Hann var meðal valdamestu og ríkustu manna landsins þar til hann fluttist alfarinn til Hamborgar.  Gissur Þorláksson, bróðursonur Gissurar Einarssonar biskups í Skálholti bjó að Núpi í lok 16. aldar.  Hann kvæntist Ragnheiði Pálsdóttur (Staðarshóls-Páll) en fórst ungur í snjóflóði á Hrafnseyrarheiði.  Þáverandi prestur að Holti, Sveinn Símonarson, færði ekkjunni þessi válegu tíðindi.  Hún er sögð hafa spurt hann, hvort hann gæti ekki reynt að gleðja sig á einhvern hátt, og prestur bað hennar.  Hún tók því vel og sonur þeirra Brynjólfur varð biskup í Skálholti.  Jón Gissurarson (Þorlákssonar) lærði gullsmíði í Hamborg og settist síðan að á Núpi.  Hann var mikill grúskari og skildi eftir sig mikið af sögubókum, sem hann skrifaði upp.

Núpur er kirkjustaður frá fornu fari.  Þar var stofnaður skóli fyrir unglinga í janúar 1907 að frumkvæði séra Sigtryggs Guðlaugssonar og tuttugu árum síðar var honum breytt í héraðsskóla samkvæmt nýsettum lögum.  Þessi skóli var starfræktur til ársins 1992.  Meðal margs, sem presturinn tók sér fyrir hendur var gerð garðsins Skrúðs, þar sem minnismerki um hann og konu hans stendur.  Skólabyggingin er notuð sem hótel á sumrin.