Rekavík bak höfn er aðeins lítil skál milli Hælavíkurbjargs og Hafnarfjalls í Hornvík. Þar stóð fyrrum einn bær samnefndur víkinni. Örðugt var til búskapar og helzt til að drýgja björgina var eggja og fuglatekja í Hraundalabjargi og fiskimið skammt undan landi. Klettar í sjó fram milli Rekavíkur og Hafnar nefnast Tröllakambur. 
Hinn 2. maí 2011, kl. 09:00 tilkynnti skipstjóri hrognkelsabáts um ísbjörn, sem hvarf í þoku uppi í hlíðum Hælavíkur.  Ekki var vitað um ferðamenn á svæðinu, en komið var í veg fyrir fyrirhugaða ferð þennan daginn.  Viðbragðsáætlun var strax virkjuð og dýrið, sem hafði skokkað alla leið til Rekavíkur, var skotið samdægurs úr þyrlu landhelgisgæzlunnar.  Þetta var líklega fjögurra ára birna, sem vóg um 150 kíló.

FLJÓTAVÍK

Fljótavík er breið vík milli Hvestu og Kögurs á Hornströndum. Byggðin hét Fljót og voru þar þrír bæir. Þar eru Atlastaðir.  Geirmundur heljarskinn Hjörsson hafði þar bú og varðveitti það Atli, þræll hans, að sögn Landnámu. Atli tók heila skipshöfn til vetursetu til að sýna, hversu mikill höfðingi húsbóndi hans hlyti að vera, þegar þræll hans þyrði að gera slíkt. Þótti Geirmundi lofið gott og gaf Atla frelsi og bú að launum. Allbúsældarlegt er í Fljótavík eins og víðar á Hornströndum. Þar er skipbrotsmannaskýli.