Allt fram til ársins 1947, þegar Jökulsá á Fjöllum var brúuð á Mývatnsöræfum, var lögferja frá Grímsstöðum aðeins norðar en brúin var reist.  Þar var hlaðið sæluhús úr steinlímdu grjóti árið 1881.  Í kjallaranum var hesthús og svefnloft fyrir ofan, þar sem var einnig eldstæði.  Óhætt er að fullyrða, að fæst sæluhúsa á landinu á þessum tíma hafi verið eins vel búin.  Í vörslu Þjóðminjasafns Íslands frá 1988.  Sigurbjörn Sigurðsson steinsmiður frá Hólum í Laxárdal.

Hvað, sem því líður, varð ekki öllum svefnsamt þar.  Húsið varð alræmt vegna draugagangs.  Gestir þess heyrðu högg og hávaða, þeim fannst þreifað á sér og hundar létu illa.  Stundum virtist einhver vera rífa þakið af húsinu.  Þeir, sem vissu lengra en nef þeirra náði, þóttust kenna ógulega ófreskju.  Einn þeirra, Jóhannes Jónsson (Drauma-Jói), lýsti henni sem kafloðnum og ægilegum veturgömlum kálfi.  Þetta hús stendur enn þá og bíður eftir gestum!