Seljalandsfoss er u.þ.b. 60 m hár og tiltölulega auðvelt er að ganga allan hringinn í kringum hann, þótt oftast sé sleipt að fara á bak við hann.

Hinn 15. janúar 1967 mældist dagsúrkoman 101 millimetrar í Skógum. Þá urðu miklir vatnavextir í ám og Seljalandsfoss ófríkkaði talsvert, þegar skarð kom í fossbrúnina.

Norðan Seljalandsfoss er eyðibýlið Hamragarðar.  Síðasti bóndinn þar, Erlendur Guðjónsson (1890-1969) gaf Skógrækt Rangæinga jörðina árið 1962 og þar hófust framkvæmdir tveimur árum síðar.  Það og Rangæingafélagið í Reykjavík keyptu bæjarhúsin og reka þar sumardvalarstað.  Norðan bæjar er einhver fallegasti foss landsins, Gljúfurárfoss, í Gljúfurá (Norðurá).  Sumir nefna þennan foss Gljúfrabúa, sem er rangnefni.