Seyðishólar í Grimsnesi er gígaþyrping, öllu stærri en Tjarnarhólar með Kerinu.  Þessir gígar eru jafngamlir Grímsneshrauninu (5000-6000 ára), sem ört vaxandi sumarhúsabyggð og ræktaður gróður eru að færa í kaf.  Stærsta hraunið í Grímsnesinu er runnið frá þeim.  Seyðishólar og Kerhóll eru hæstir gíganna og það er gaman að leggja leið sína upp á efstu brúnir þeirra og njóta útsýnisins á góðum degi.

Gjallið í gígunum er ákaflega litríkt og skrautlegt og mörg ljót sár í hlíðum þeirra bera merki áratuga gjallnáms, sem náttúruvinir hafa litið hornauga í gegnum tíðina.  Gjallið hefur verið notað líkt og vikur til holsteinagerðar og einnig sem ofaníburður á vegi í nágrenni gíganna.  Kerhóll, sem stendur við hlið Seyðishóla, hefur sloppið við gjalltöku.  Hraunin frá honum og Seyðishólum runnu nær samtímis og þekja u.þ.b. 23 km².

Rauði liturinn í gjallinu hefur myndazt við oxun járns í hraunkvikunni, einkum þegar hún kemst í snertingu við vatn (grunnvatn).  Það er vel þess virði að leggja lykkju á leið sína um Grímsnesið og aka Búrfellsleiðina og kíkja í eina námuna til að finna skrautgjall.