Skriðdalur nær frá Völlum á Héraði að Breiðdalsheiði og Öxi í suðri.  Þar sem hann er breiðastur, klofnar hann um Þingmúlann í Norður- og Suðurdal.  Skriðuvatn er í Suðurdal og afrennsli þess er Múlaá, en Geitdalsá fellur úr Norðurdal, sem hét Geitdalur áður.  Þegar árnar hafa sameinazt er Grímsá komin til skjalanna.  Grímsárvirkjun er í landi Stóra-Sandfells.  Þingmúli er kirkjustaður sveitarinnar, en þar var áður hinn forni þingstaður, sem Múlaþing heitir eftir.  Núverandi þingstaður sveitarinnar er að Arnhólsstöðum, gegnt Múlastað, en þar er samkomuhúsið.  Þjóðvegur #1 liggur um Suðurdal til Breiðdals.

Árið 1995 fannst fornmannsgröf rétt sunnan Þórisár í Skriðdal, spölkorn ofna við þjóðveginn.  Þetta reyndist eitt merkasta kuml frá landnámsöld, sem fundizt hefur hér á landi.  Ríkur höfðingi hefur veið heygður þar ásamt hesti sínum, vopnum og skartgripum.  Grautarskál, sem fannst meðal munanna, vakti mikla athygli.  Hún varð til þess, að sumir eigna kumblið  landnámsmanninum Graut-Atla.  Aðrir gizka á Ævar hinn forna.  Kumlinu var komið fyrir með upphaflegum ummerkjum í Minjasafni Austurlands á Egilsstöðum.