Grótta er yzti hluti Seltjarnarness.  Hún er í rauninni eyja, sem tengist landi með flæðigranda.  Þar var fyrrum bær og viti, sem var byggður 1897 og endurbyggður 1947 og haldið við síðan.  Björgunarsveit Slysavarnarfélagsins á Seltjarnarnesi var skírð eftir Albert Þorsteinssyni (1910-1973), sem var lengi vitavörður í Gróttu.  Fyrrum var útræði talsvert frá Gróttu og þaðan fórust skip eins og annars staðar. Eftirfarandi visa heyrðist eitt sinn kveðin á glugga eftir skipskaða:

Dauðinn sótti sjávardrótt,
sog var ljótt í dröngum.
Ekki er rótt að eiga nótt
undir Gróttutöngum.

Fuglalíf er fjölbreytt í eyjunni og umhverfis hana og stundum sjást selir fyrir landi.  Landsig á þessum slóðum er áberandi, þannig að hægt er að fylgjast með gróðurlendi fara smám saman undir sjó.  Í næsta nágrenni er golfvöllur Golfklúbbsins Ness og stefnuviti fyrir flugbraut 31/13.  Grótta var friðlýst árið 1974.