Mörk þessa svæðis eru hér dregin frá Jökulsárlóni að Reykjanesi. Þéttbýlis- og merkisstaða og afþreyingar innan svæðisins er sérstaklega getið neðan við sérkort á Ferðavísinum . Suðurland er bæði fjöl- og strjálbýlt. Milli Hafnar og Markarfljóts er landrými af skornum skammti til búskapar, en vestar er stærsta landbúnaðarhérað landsins og nokkrir þéttbýlisstaðir. Landslag er bæði hálent og láglent. Einkennandi fyrir Suðurland er hin sendna og flata strandlengja. Þaðan var sjósókn stunduð um aldir og rekaviði safnað.

Fjöldi skipa og báta hefur strandað og farizt fyrir Suðurströndinni og margir skipskrokkar grafizt í sandinn. Margar fegurstu náttúruperlna landsins  er að finna í fjöllunum meðfram ströndinni og í uppsveitum vesturhlutans. Jöklum prýtt fjalllendið býr yfir einhverjum mestu eldfjöllum og gossprungum landsins, stórum og smáum ríólítinnskotum og móbergsfjöllum. Mikinn jarðhita er að finna frá austanverðri miðju svæðisins til vesturs. Atvinnulífið er fjölbreytt. Fiskveiðar og -verkun eru stundaðar frá þremur höfnum, landbúnaður er mikilvægur, iðnaður fer vaxandi og ferðaþjónustunni vex stöðugt fiskur um hrygg. Samgöngur eru með bezta móti allt árið, þótt stundum sé þæfingur í snjó á veturna. Þjóðvegur 1 liggur í gegnum Suðurland endilangt. Sögustaðir eru margir, m.a. tengdir Landnámu, Njálu og Sturlungu. Afþreying er mjög fjölbreytt.