Mörk þessa svæðis eru hér dregin frá botni Hvalfjarðar og vestan Þingvallavatns til sjávar við rætur Reykjness. Þéttbýlis- og merkisstaða og afþreyingar innan svæðis er sérstaklega getið neðan við sérkort á Ferðavísinum. Suðvesturland er þéttbýlasti hluti landsins. Þar búa næstum 75% íbúa landsins. Landslag er tiltölulega láglent á Reykjanesi og með ströndum fram, en það hækkar og láglendi minnkar, er norðar dregur. Norðan til er þetta landsvæði hluti af vestara blágrýtissvæði landsins en móbergs- og ríólítfjöll og hraunbreiður skiptast á annars staðar. Víða er að finna skoðunarverðar náttúruperlur og sögustaði. Atvinnulíf er fjölskrúðugra og tryggara á Suðvesturlandi en víðast annars staðar á landinu. Þessi landshluti kemur víða við í Íslandssögum, s.s. í Landnámu, Sturlungu og Gunnlaugssögu. Þróun byggðar er hægt að rekja til fyrsta landnáms norrænna manna til okkar tíma. Samgöngur innan svæðisins og milli þess og annarra landshluta eru betri en annars staðar á landinu allt árið. Hvergi annars staðar á landinu er boðin fjölbreyttari og tryggari afþreying allt árið en á Suðvesturlandi, þótt sumt þurfi að sækja út fyrir mörkin.