04.08.2006
Reykjanesfólkvangur - leitið ekki langt yfir
skammt
Kjörinn til útivistar og náttúruskoðunar
Á heimasíðu Umhverfissviðs Reykjavíkur er að finna náttúruvef um
Reykjanesfólkvang. Vefurinn inniheldur fræðslu, myndir, kort yfir gönguleiðir og
greinargóðar leiðarlýsingar. Fólkvangurinn er um 300 km2 að stærð og því
langstærsta friðlýsta svæðið sinnar tegundar hér á landi. Möguleikarnir til að
stunda útivist og náttúruskoðun í næsta nágrenni helsta þéttbýliskjarna landsins
eru því einstakir.
Reykjanesfólkvangur er náttúrperla sem of fáir vita um eða kunna að njóta. Við
ströndina eru t.a.m. litlar víkur, Hælsvík og Keflavík og milli þeirra er
strandbergið Krýsuvíkurberg. Fólkvangurinn er kjörinn til útivistar og
náttúruskoðunar.
Gönguleiðir í Reykjanesfólkvangi eru við allra hæfi. Á vefnum eru nokkur dæmi
fyrir þá sem vilja komast í snertingu við sögu- og náttúruminjar, hugleiða
aldalanga búsetu þjóðarinnar í stórbrotnu landi, rýna í fjölskrúðugt gróðurfar
eða stunda holla hreyfingu. Það er hægt að stefna á hæstu tinda til að njóta
útsýnis og reyna á sig, eða taka því rólega og ganga um fáfarnar slóðir og gæta
að hinu smáa í náttúrunni. Á vef Reykjavíkurfólkvangs fylgja um 30 leiðalýsingar
og kort á PDF útgáfu fyrir hin ýmsu svæði fólkvangsins. Meðal áfangastaða í
Reykjanesfólkvangi er Kleifarvatn, sem er stærsta og dýpsta stöðuvatn á
Suðurnesjum, Krýsuvík, Seltún, Húshólmi, Hrútagjá og Grænavatn.
Gróður, dýralíf og jarðfræði
Alls hafa fundist tæplega 200 tegundir blómaplantna og byrkninga (burknar,
elftingar, jafnar) í Reykjanesfólkvangi. Flestar tegundirnar eru algengar um
land allt, en einstaka eru bundnar við Suðurland, t.d. grástör og gullkollur.
Krísuvíkurberg er stærsta fuglabjarg Reykjanesskaga. Rita er þar yfirgnæfandi,
en einnig er mikið af fýl og svartfuglstegundunum, álku, langvíu og stuttnefju.
Að auki verpur þar lundi, teista, toppskarfur og silfurmáfur. Undir berginu má
stundum sjá útseli og lengra úti má stundum sjá til hvala af bergbrúninni.
Reykjanesfólkvangur er á miðju virka gosbeltinu, sem liggur eftir Reykjanesskaga
endilöngum. Gossaga skagans er tiltölulega vel þekkt.
Umgengnisreglur
Í friðlýsingu felst, að öllum er frjálst að fara um og dvelja á svæðinu nema þar
sem er girt vatnsból og ræktað land. Virða skal reglur um góða umgengni og
umferð. Megin umgengnisreglurnar eru: ökum ekki utan merktra vega, hlífum
gróðri, sýnum dýrunum nærgætni, kveikjum ekki elda, hirðum rusl og úrgang,
hlöðum ekki vörður, letrum ekki á náttúrumyndanir, göngum vel um hveri og
laugar, rífum ekki upp mosa eða hellur, göngum snyrtilega um tjaldstæðin,
sleppum hestum ekki lausum.
Reykjanesfólkvangur var stofnaður með reglugerð
árið 1975, og standa að honum þessi sveitafélög: Reykjavík, Seltjarnarnes,
Kópavogur, Garðabær, Hafnarfjörður, Grindavík og Reykjanesbær