1. Nafn trúfélagsins er Hvítasunnukirkjan á Íslandi, og er það til heimilis hjá skrásettum Hvítasunnukirkjum á Íslandi. Varnarþing er í Reykjavík. Hvítasunnukirkjan á Íslandi skal hafa sameiginlegt einkennismerki.

2. Trúarjátning trúfélagsins er: Jesús er Drottinn (1. Korintubréf 12:3).

Kenningar

2.1. Við trúum að Biblían, Heilög ritning, sé innblásin, óskeikul, óvéfengjanleg og myndugt orð Guðs. (2. Tímóteusarbréf 3:16)

2.2. Við trúum á einn Guð, sem eilíflega er til í persónum Heilagrar þrenningar (1. Jóhannesarbréf 5:7-8)

2.3. Við trúum á meyjarfæðingu Drottins Jesú Krists, að Guðdómur hans hafi verið ótakmarkaður, að mannlíf hans hafi verið syndlaust og fullkomið. (Lúkas 1:35)

2.4. Við trúum að friðþægingardauði Jesú á Golgata sé fullnægjandi að eilífu fyrir alla iðrandi menn. (Jóhannes 3:16)

2.5. Við trúum líkamlegri upprisu Jesú frá dauðum, uppstigningu hans til hægri handar föðurins á himni. (Jóhannes 20:20)

2.6. Við trúum persónulegri endurkomu Jesú, þegar hann hrífur brúði sína til fundar við sig í loftinu, og að eftir það muni hann stíga niður á Olíufjallið og stofnsetja þúsund ára friðarríki hér á jörð. (Postulasagan 1:11)

2.7. Við trúum að í vændum sé Nýr himinn og Ný jörð, þar sem hið fyrra er horfið og hafið ekki lengur til. ( Opinberunarbókin 21:1)

2.8. Við trúum að réttlæting af synd sé dómgjörð Guðs og eingöngu byggð á friðþægingarverki Jesú Krists. Við trúum að endurfæðing fyrir kraft Heilags anda sé algjör nauðsyn til persónulegrar endurlausnar. (Rómverjabréfið 3:24; Jóhannes 3:3)

2.9. Við trúum á gildi helgaðs og guðrækilegs lífernis. Við trúum að hjónabandið sé heilagt og því megi ekki rifta. Virða skal helgi hvíldardagsins, hins fyrsta dags vikunnar, upprisudags Drottins. Gæta skal algjörrar bindindissemi meðal Hvítasunnumanna. (Hebreabréfið 12:14; Galatabréfið 5:21)

2.10. Við trúum á raunveruleika skírnar í Heilögum anda og eldi fyrir daginn í dag. Að náðargjafir Heilags anda séu gefnar til þjónustu í söfnuðinum, þar á meðal yfirskilvitleg lækning Drottins fyrir líkama mannsins. (1. Pétursbréf 2:24)

2.11. Við trúum á Drottinvald Jesú yfir söfnuðinum. Virt sé framkvæmd skírnar með niðurdýfingu í vatn í nafni Heilagrar þrenningar, til Jesú Krists og safnaðarins. Ekki skulu aðrir en endurfæddir skírast. Kvöldmáltíð Drottins er fyrir þá sem eru endurfæddir. (Kólossubréfið 1:18; 1. Korintubréf 12:13; Matteus 28:19)

2.12. Við trúum á eilífa blessun hinna endurleystu á himni og eilífa refsingu hinna óendurfæddu í eldsdíki (Matteus 25:46)

3. Hvítasunnukirkjan á Íslandi er samtök sjálfstæðra Hvítasunnukirkna sem aðhyllast sameiginlega trúarjátningu, kenningar og reglur um starfshætti og njóta viðurkenningar aðalfundar Hvítasunnuhreyfingarinnar. Sérhver sjálfstæð Hvítasunnukirkja er sjálfráð um framkvæmd safnaðarstarfs síns og ábyrg fyrir fjárhag sínum.

4. Hverjum sjálfsstæðum Hvítasunnusöfnuði skulu tilheyra hið fæsta tólf meðlimir, sextán ára og eldri. Við gildistöku þessara samþykkta samanstendur Hvítasunnukirkjan af eftirtöldum söfnuðum:

Hvítasunnukirkjan Akureyri.
Hvítasunnukirkjan Fíladelfía, Reykjavík.
Hvítasunnukirkjan í Kirkjulækjarkoti.
Hvítasunnukirkjan Salem, Ísafirði.
Hvítasunnukirkjan Vegurinn, Keflavík
Hvítasunnukirkjan Vestmannaeyjum.

Eftirtaldar deildir eru innan safnaðanna:
Hvítasunnukirkjan Akureyri, deildir:
Hvítasunnukirkjan Betesda, Ólafsfirði.
Hvítasunnukirkjan Vopnafirði
Hvítasunnukirkjan Síon, Siglufirði.

Hvítasunnukirkjan Fíladelfía, Reykjavík, deildir:
Hvítasunnukirkjan Fíladelfía, Selfossi.
Hvítasunnukirkjan Fíladelfía, Stykkishólmi.

Hvítasunnukirkjan Kirkjulækjarkoti, deildir:
Hvítasunnukirkjan Höfn í Hornafirði
Hvítasunnukirkjan Hvolsvelli.

5. Stjórn Hvítasunnukirkjunnar á Íslandi skipa öldungar (stjórnarmenn) aðildarsafnaðanna. Stjórn Hvítasunnukirkjunnar getur kosið sér þriggja manna framkvæmdanefnd, er starfi milli aðalfunda.

6. Starfssvæði presta Hvítasunnukirkjunnar er Ísland.

7. Stjórn hvers staðbundins safnaðar veitir fólki inngöngu í söfnuðinn. Safnaðarfólk skal tilheyra þeim söfnuði, sem næstur er lögheimili þess. Hverjum og einum er heimilt að segja sig úr söfnuðinum, er hann óskar þess. Úrsögn skal senda skriflega til forstöðumanns eða safnaðarstjórnar viðkomandi safnaðar, svo og tilkynna hana Hagstofu Íslands. Safnaðarstjórn hvers safnaðar hefur vald til að vísa einstaklingum úr söfnuðinum.

8. Aðalfundir

8.1. Aðalfund Hvítasunnukirkjunnar skal halda árlega í Kirkjulækjarkoti að afloknum trúboðafundi á tímabilinu febrúar-mars. Rétt til setu á aðalfundi hafa stjórnarmenn Hvítasunnukirkjunnar eða varamenn þeirra. Geti öldungur (stjórnarmaður) safnaðar ekki mætt til aðalfundar, getur viðkomandi söfnuður valið og sent fulltrúa (varamann) í hans stað. Þeir menn, sem valdir hafa verið í nefndir, stjórnir og önnur störf á vegum Hvítasunnukirkjunnar hafa sama rétt til fundarsetu og aðalfulltrúar, þegar málefni þeim viðkomandi eru til umræðu og afgreiðslu.

Makar stjórnarmanna, svo og fulltrúar á trúboðafundi, hafa rétt til áheyrnar á aðalfundi. Þó getur aðalfundur ákveðið að halda lokaðan fund.

8.2. Til aðalfundar skal boða með eins mánaðar fyrirvara hið minnsta. Í fundarboði skal tilgreina þau mál, sem fundar-boðenda hafa borist og vitað er að fyrir liggja auk venjulegra aðalfundarstarfa.

Fundarboð skal senda skriflega til allra, sem vitað er að hafa rétt til fundarsetu.

Fundur er löglegur ef 2/3 boðaðra fundarmanna eða varamenn þeirra er mættur.

Sé aðalfundur ólöglegur vegna ónógrar þátttöku, skal halda annan aðalfund innan eins mánaðar frá fyrri fundardegi og telst síðari fundurinn löglegur án tillits til fjölda fundarmanna. Síðari fundinn skal boða skriflega með tveggja vikna fyrirvara hið minnsta.

Aðalfundur getur ákveðið framhaldsaðalfund.

8.3. Fulltrúi fundarboðenda setur aðalfund og lætur kjósa fundarstjóra, sem lætur kjósa fundarritara. Halda skal fundargerðir aðalfunda.

Starfssvið aðalfundar er:

1) Að vera stjórnarfundur Hvítasunnukirkjunnar á Íslandi.

2) Að fara með æðsta vald í sameiginlegum málum

Hvítasunnukirkjunnar.

3) Að vera stefnumótandi í framkvæmd sameiginlegra mála

Hvítasunnukirkjunnar.

4) Að samþykkja söfnuði til inngöngu í Hvítasunnukirkjuna.

5) Að kjósa í nefndir, stjórnir, endurskoðendur, sameiginlegra sjóða og önnur störf á vegum Hvítasunnukirkjunnar.

8.4. Nefndir og stjórnir á vegum Hvítasunnukirkjunnar eru:

F r a m k v æ m d a n e f n d sem skipuð er forstöðumönnum allra sjálfstæðu Hvítasunnukirknanna á Íslandi. Hún fjallar um mál, sem varða Hvítasunnukirkjuna í heild, og upp kunna að koma milli aðalfunda. Framkvæmdanefnd annast einnig: Eftirlit með að samþykktum aðalfunda sé framfylgt; samskipti Hvítasunnukirkjunnar út á við; að mæla með umsækjendum um opinber réttindi við Dóms- og kirkjumálaráðuneytið fyrir hönd Hvítasunnukirkjunnar; að undirbúa og boða til aðalfundar og trúboðafunda; annast skýrslugjöf til Dóms- og kirkjumálaráðuneytisins. Framkvæmdanefnd velur sér framkvæmdastjóra til að fylgja þessu eftir.

S i ð f e r ð i s r á ð er skipað þremur forstöðumönnum sjálfstæðu safnaðanna og hver maður situr í tvö ár í senn. Ef upp kemur ágreiningur í stjórn safnaðar eða milli stjórnar og safnaðar og eða ef upp kemur siðferðisbrestur innan safnaðar sem ekki er hægt að leysa hjálparlaust má safnaðarstjórn í heild eða hluta leita til Siðferðisráðs sem hefði vald til að fara inn í málið.

Sjái Siðferðisráð ástæðu til íhlutunar án beiðni frá stjórn eða safnaðarmeðlimum hefur nefndin heimild til íhlutunar. Siðferðisráð starfi þá í samráði við viðeigandi safnaðarstjórn.

Siðferðisráð hefur rétt til að kalla sér til ráðuneytis hvern þann sem þurfa þykir. Komi upp mál sem varðar forstöðumann í Siðferðisráði skal hann víkja sæti í tilteknu máli. Ef upp kemur mál á milli tveggja forstöðumanna í Siðferðisráði skulu þeir báðir víkja sæti.

K r i s t n i b o ð s n e f n d annast sameiginleg kristniboðsmál Hvítasunnukirkjunnar. Í nefndinni sitja fimm fulltrúar safnaðanna og skulu þeir tilnefndir af söfnuðinum til eins árs. Nefndin skiptir með sér störfum formanns, gjaldkera, ritara og meðstjórnenda. Nefndin hefur til ráðstöfunar sameiginlegan kristniboðssjóð Hvítasunnukirkjunnar. Nefndin gefur aðalfundi skýrslu um störf sín.

S k á l a s t j ó r n annast málefni Skálans í Kirkjulækjarkoti. Stjórn þess staðar er skipuð fimm mönnum, þar af eru gefendur staðarins í stjórn, meðan þeirra nýtur við. Heimilt er gefendum hverjum um sig að tilnefna fulltrúa í sinn stað, sem þá fari með fullt umboð, eða mann í sinn stað í stjórnina. Stjórn verði kosin til tveggja ára, þó þannig að aðeins verði skipt um einn mann í senn. Kosning fari fram á árlegum aðalfundi Hvítasunnukirkjunnar. Kosning fari fram eftir venjulegum fundarreglum. Nefndin gefur aðalfundi skýrslu um störf sín.

8.5 Atkvæðagreiðslur fara fram með handauppréttingu, eða skriflega sé þess óskað. Ef um tvær eða fleiri tilnefningar er að ræða, ræður einfaldur meirihluti atkvæða fundarmanna, þ.e. sá sem flest atkvæði hlýtur telst kjörinn.  Þegar um eina tilnefningu er að ræða, ræður hreinn meirihluti fundarmanna, þ.e. meira en helmingur fundarmanna. Um röð tillagna við atkvæðagreiðslur, sé farið eftir almennum fundarreglum. Síðan er borin upp tillaga, og að síðustu viðaukatillaga.

8.6. Söfnuðir Hvítasunnuhreyfingar halda aðalfundi sína á þeim tíma, sem hverjum og einum best hentar. Stjórnarfundir hvers safnaðar séu haldnir eftir þörfum. Sama á við um félög og stofnanir innan Hvítasunnuhreyfingarinnar.

9. Gjaldkerar sameiginlegra sjóða skulu halda bókhald samkvæmt góðri reikningsskilavenju. Þeir skulu leggja fram endurskoðaða reikninga á aðalfundi Hvítasunnukirkjunnar.

10. Leggi kirkja niður starf sitt af einhverjum ástæðum, skulu eignir hennar renna til næstu sjálfstæðu Hvítasunnukirkju, sem hefur sömu trú og kenningu. Ef ákvörðun á að vera gild verður að samþykkja hana í viðkomandi kirkju á tveimur aðalfundum í röð með minnst þriggja mánaða millibili. Á hvorum fundinum fyrir sig verða minnst 2/3 hlutar viðstaddra að gefa samþykki sitt.