Djúpavatn er 0,15 km² stöðuvatn sunnan Trölladyngju og Soga á Reykjanesskaga í 195 m hæð yfir sjó. Dýpsti hluti þess er 16,7 m og það er líklega gígvatn líkt og Grænavatn á Vesturhálsi og Arnarvatn á Sveifluhálsi. Umhverfi þessa vatns er ákaflega fallegt og friðsælt.

Mikið er af bleikju í vatninu en hún er fremur smá. Það var talið fisklaust þar til bleikju af Þingvallastofni var sleppt í það í kringum 1960. Vatnið er afar vinsælt hjá fjölskyldufólki, því stangarfjöldi er takmarkaður og því hægt að hafa vatnið út af fyrir sig. Gott hús er og á staðnum til afnota fyrir veiðimenn.

Stangaveiðifélag Hafnarfjarðar hefur vatnið á leigu. Einnig hefur SVFR haft leyfi í vatnið í umboðssölu.
Vegalengdin frá Reykjavík er um 35 km.