Ódáðavötn eru tvö, u.þ.b. 2 km2, vogskorin með mörgum hólmum.  Gömul leið lá yfir kíl, sem tengir vötnin.  Sagan segir, að veiðimenn úr Skriðdal hafi setið þar fyrir ferðamönnum og drepið þá sér til fjár.  Þessi leið var gjarnan farin milli Fljótsdals og Djúpavogs allt til áratugarins 1870-1880.  Öxará fellur úr vötnunum niður á Öxi og út í Víðigróf í Skriðdal til Skriðuvatns.  Úrrennsli vatnsins heitir Múlaá, sem sameinast Geitdalsá utan Þingmúla og þaðan heitir áin Grímsá.  Haustið 1964 var gerð stífla í Öxará rétt neðan vatnanna til vatnsmiðlunar fyrir Grímsárvirkjun.  Þá kom í ljós hleðsla þvert yfir vatnið, þar sem það var mjóst.