Snjóölduvatn er syðsta vatnið og hið stærsta í 562 m hæð yfir sjó, 1,62 km² og dýpst 22 m. Rúmmál þess er 12,7 Gl, mesta lengd 2,1 km og mesta breidd 1,4 km. Úr því fellur kvísl í Tungná.  Umhverfi vatnsins er gróðurvana. Austanvert, í skarði milli Snjóöldu og fjallgarðs, suður af Kvíslum, stendur stór drangur, sem heitir Tröllið eða Nátttröllið við Tungná. Nokkru fyrir norðan það fundust kofarústir 1936, líklega íverustaður og skemma fyrir veiði. Veiði í vatninu hefur farið minnkandi frá 1994 (158 stk. 1998) en þó er ekki fullreynt.